Mano Po

Tinulungan ko kagabi ang aking pamangkin na gumawa ng kanyang takdang aralin. Ito ang nagawa namin. 

Mando, Ang Batang Magalang

“Mano po, Inay,” kinuha ni Mando ang kamay ng kanyang ina at inilagay ito sa kanyang noo. Palagi ito ginagawa ni Mando tuwing dumating siya sa bahay mula sa paaralan. Kahit likas na mabait at magalang si Mando, natutunan niya ang “mano po” mula sa kanyang guro.

Si Mando ang panganay sa dalawang anak nila Mang Manolo at Aling Dolores. Nasa ikatlong baitang na sa elementarya si Mando. Isa sa mga natutunan niya sa paaralan ay ang paggalang sa mga magulang lalo na sa paggamit ng “mano po” at mula noon ay naging nakagawian na itong gawin ni Mando sa kanyang mga magulang at sa mga nakakatanda sa kanya.

Ang hindi alam ni Mando, nakikita ito ng kanyang bunsong kapatid na si Junior. Tinanong siya ng kanyang kapatid kung ano ang kahulugan ng “mano po” at bakit palagi niya itong ginagawa. Natutuwa si Mando dahil nagkaroon ng interes ang kapatid at tinuruan niya ito ng tamang aksyon. “Ito ang gawin mo, yumuko ka ng kunti tapos kunin mo sa iyong kanang kamay ang kanang kamay ni tatay o nanay at ilagay mo sa iyong noo,” paliwanag ni Mando sa kapatid. “Ganito ba kuya?” tanong ni Junior sabay yuko ng kunti, kinuha at inilagay ang kanyang kamay sa noo nito. “Wow, ang galling at nakuha mo agad,” tuwang-tuwa si Mando sa limang taong gulang na kapatid.

“Kuya, bakit ka nag-mano po?” tanong ni Junior. Hindi agad sinagot ni Mando ang kapatid, at tinanong niya ito, “Ano sa tingin mo ang dahilan kung bakit nagsisikap sina tatay at nanay sa pagsasaka?” “Para meron tayo makain, lalo na pambili ng isda.” sagot ng nakababatang kapatid. “Tama. Ano pa?” diin ng Mando. “Para meron tayo pambili ng damit.” “Ano pa?” “Para meron tayo pambili ng laruan?” Sa pagkakataon na ito, iniba ni Mando ang tanong sa kapatid, “Bakit gusto nina tatay at nanay na meron tayo makakain, damit, at laruan?” Natahimik si Junior at nag-isip. “Sabi ni nanay dahil mahal na mahal nila tayo,” sagot ni Junior. “Tama ka Jun, nagsisikap sina tatay at nanay dahil mahal na mahal nila tayo. Kaya ipakita din natin sa kanila na mahal natin sila sa pamamagitan ng pagtulong sa mga gawaing bahay, sa pagsisikap na mag-aral, sa pakikinig at pagtupad ng kanilang mga payo, at sa pamamagitan ng paggalang natin sa kanila, gaya ng mano po,” paliwanag ni Mando sa kapatid. “Tama ka, kuya. Simula mamayang gabi, sabay na tayo mag-mano po kina tatay at nanay,” wika ni Junior sa kapatid.